“يالله ياللي ماخفا عنك الحال” قصيدة للشاعر سعد القرشي

يالله ياللي ماخفا عنك الحال
ياعالمن مافي القلوب الخفيه

تكتب لنا البسمه وتشرح لنا البال
وتغفر لنا من كل ذنب وخطيه

ويالله تجنبنا عن دروب الانذال
اللي معانا وبالقفا سم حيه

هذا الزمن فيه العجايب والاهوال
وين القلوب الصافيات النقيه

ذا الوقت فيه الحق ماعاد ينقال
كلن يجامل بالخطأ مع خويه

الرجل مايغرونه الناس بالمال
لاتحط نفسك بالأمور الدنيه

وماكل من يلبس له شماغ وعقال
وقت المواقف به عزومن قويه

سلم على اللي للقريبين مدهال
واليا عطا ماينتظر له عطيه

وابعد عن النمام والقيل والقال
اتبع كلام الله وسنة نبيه

ولاتجحد المعروف لو كان مثقال
احذر تكون من النفوس الرديه

هذا كلام الحق ياطيب الفال
والحق أقوله لو عليك وعليه

وختامها وإعداد ماهل همال
صلوا على خير البشر والبريه