قصيدة مهداه من الشاعر / ذياب الميموني المطيري الى الشاعر والإعلامي / فيحان محسن الجليم البقمي
ابطيت عن ساده دروب الطواريق
لو ان ما زليت درب الصداقه
الشعر تال الوقت يحتاج تدقيق
ماعاد له ف مهبل الخلق فاقه
ما عندنا لـ عبادة الوجه تسويق
و ما ندوّر لـ وصله ندّور فراقه
لو صب لي دله و قهواني ابريق
و قلّط علي من الشحم ولد ناقه
انا مايجرفني دعايه و تشويق
لـ اللي قطع من كل طيب العلاقه
مدحي ما ينصى غير رووس المطاليق
ولا الردي يبي يضيق خناقه
بعض الشوارب لـ الشحوم المغاليق
و بعض الشوارب مالها الا الحلاقه
مفروض يالاحوال بصمه و توثيق
فيحان سبع انعام وسط البطاقه
ي ذخر محسن وافي وفعلك يليق
على مقامك ما انت قطّاع ساقه
في لازم اللي عاني لك من الضيق
وقفتك معه و فعلك الشرهه شاقه
جهدك ماهو قاصر ولا نشف لك ريق
عندك على درب الصعيبات طاقه
ماخنت فالطاله عهود و مواثيق
ولا خنت فالرفقه حقوق الرفاقه
انت الجليم و منزلك فالشواهيق
مافيه شيً عن الامجاد عاقه
تفوق بـ طيبه و حاز التوافيق
و عشق دروب ام الجمايل عشاقه
اثقل من جبال السروات و طويق
جميل مقدامن من الطيب حاقه