سقى الله الزمان اللي مضالي
الايام القديمه والليالي
زمان الوقت الاول والبصاطه
قلوبً بيض وفكارً جزالي
تقول انا سوى من راس شايب
كبير السن ابو كل العيالي
وصغيرهم ينادي الكل ياعم
طموحه يلبس شماغ وعقالي
انارتهم مواطير ومكاين
هذا اللي له مكانً ما يطالي
وكثرتهم على الفانوس الاول
على القاز وفتيله الاشتعالي
على الميسور تجمعنا المحبه
ونارً جنبها صفر الدلالي
وسواليفً لها ذوق وطرافه
تفيد المستمع في كل حالي
قصيدً فيه طيب وفيه حكمه
لابن غانم وابو زيد الهلالي
وشيوخً بعضها يرسل للاخر
وفريس ومشاهير وحلالي
تعيد الذاكره بعض المواقف
سوات الخط في خد الخيالي
لياجا العيد نستانس ونفرح
من النشوه تقل فينا هبالي
على الفطره نسوي ما نريده
ولا يطري لنا درب الخمالي
ولا جا الليل كلً جاب حاجه
ولافيها تكلف او تعالي
ولامنا على الطيب اجتمعنا
تسامرنا الثريا و الهلالي
وكل جر مسحوبه وغنا
جنوبي والهوا ميل شمالي
ولا يبري الجروح الا الربابه
ليا تل الوتر والقوس مالي
بعض الابيات لامنه سحبها
احس اني من اصحاب المعالي
لو اني مطفر وعلى الحديده
ولا عندي جنيه ولا ريالي
ولامني سمعت اللحن كني
على عرش الغنا جالس لحالي
كلام ابوعمر حرك هجوسي
وبنيت من القوافي ما بدالي
ولو ان البشر فيها تغير
لاكن الخير فيها مايزالي
